Kryetari i Partisë Demokratike të Kosovës (PDK), Memli Krasniqi ka reaguar pas ndërprerjes së ndeshjes Kosovë-Rumani pas thirrjeve të tifozëve rumunë “Kosova është Serbi” duke thënë që s’ka slogan që e ndryshon realitetin tonë.

Me anë të një postimi në Facebook, Krasniqi ka shkruar se ”slloganet politike, koret fashiste, fishkëllimat e sharjet drejt djemve tanë dhe Kosovës në Rumani – nuk na ndalin.”, shkruan Arbresh.info.

“Që nga 17 shkurti i vitit 2008, Kosova është shtet i pavarur, ndërkaq, që nga 3 maji i vitit 2016, Kosova është anëtare me të drejta të plota në UEFA. Slloganet politike, koret fashiste, fishkëllimat e sharjet drejt djemve tanë dhe Kosovës në Rumani – nuk na ndalin”, u shpreh Krasniqi.

Tutje i pari i PDK-së tha se Kosova, si shtet dhe si kombëtare futbollistike, do të paraqitet me krenari gjithandej nëpër botë, “edhe ku nuk na duan e posaçërisht aty”.

“Kemi punuar shumë për këtë ditë dhe nuk dorëzohemi para fashistëve të vegjël turbofolk. E përjetshme është Kosova!”, tha ai./Arbresh.info